Бахрейн – Парсы шығанағында орналасқан 33 аралдан тұратын араб елі. Бахрейн Сауд Арабиясынан 16 км қашықтықта орналасқан және бұл елдерді автомобиль көпірі байланыстырады.

Астанасы – Манама.

Географиялық орналасуы: Парсы шығанағының батыс бөлігінде, Сауд Арабиясының шығысында және Катардың батысында. Бахрейн – бүкіл аумағы аралдарда орналасқан жалғыз араб елі. Бахрейннің көптеген артықшылықтары бар: біріншіден, бұл шағын ел – ең кішкентай араб мемлекеті; екіншіден, Бахрейн – шынайы корольдік; үшіншіден, бұл елдің табиғатын «жұмақ бақтары» деп атауға болады. Араб тілінен аударғанда Бахрейн «екі теңіз» дегенді білдіреді: біріншісі – Парсы шығанағы, ал екіншісі – жер асты сулары, өйткені Бахрейнде үлкен тұщы су қоры табылған.

Жалпы ауданы – бар болғаны 640 шаршы км, бұл Алматының ауданынан да аз. Бірақ Бахрейннің 161 км ұзындықтағы әсем жағалау сызығы бар. Елдің байлығы – ежелгі мәдениет, бірегей өнер, ерекше тарих, көркем табиғат және бірегей ұлттық тағамдары. Бахрейн табиғаты ешкімді бей-жай қалдырмайды: шөлейт құмды дөңдер мен теңіз ортасындағы гүлденген сирек кездесетін флора мен фауна түрлері бар оазистің ерекше үйлесімі. Тұщы су көздерінің көптігі – нағыз сыйлық! Бахрейн, Киелі кітаптағы аңыздарға сәйкес, Едем орналасқан жер деп бекер айтылмаған. Заманауи Бахрейнді де жұмақ бағы деп атауға болады.

Бахрейн табиғатын тамашалау – бұл елге келудің басты себептерінің бірі. Қонақжай ел туристерді араб экзотикасымен және сәнді жағажай демалысымен қызықтырады. Туристерге ұсынылатын іс-шаралардың алуан түрлілігі ең талғампаз туристерді де қуантады: сұңқармен аң аулау - таңдаулылардың артықшылығы болып табылады, сосымен қатар інжу іздеу, түйелер мен жылқылармен серуендеу, аристократиялық гольф, тиімді сауда және тіпті «Формула-1» жарыстары!

Климаты: елдің климаты тропикалықтан субтропикалыққа өтпелі ретінде сипаттауға болады. Қысы жұмсақ және құрғақ, ал жазы ыстық және ылғалды. Қазаннан сәуірге дейінгі кезең – саяхатқа ең қолайлы уақыт. Жазда орташа температура маусымнан тамызға дейін +37-45°С, ал қыста желтоқсаннан қаңтарға дейін +8-20°С.

Саяси жүйесі және тарихы. Бахрейн тәуелсіз мемлекетке 1971 жылы 14 тамызда айналды. 2002 жылы 14 ақпанда елдің қазіргі билеушісі шейх Хамад бин Иса Аль Халифа Конституцияға өзгерістер енгізу туралы заңға қол қойып, Бахрейн эмиратын Бахрейн Корольдігіне айналдырды. Эмир король атанды. Айта кету керек, қазіргі Бахрейн королі билікке 1999 жылы әкесі шейх Иса бин Салман Аль Халифа қайтыс болғаннан кейін келген. Бахрейн тарихы б.з.д. 3000 жылдан басталады. Ал XVIII ғасырдың басында Парсы шығанағының жағалауына Аль Халифа, Аль Сабах және Аль Джалахима сияқты әулеттердің өкілдері басқарған тайпа қоныстанды. Кейіннен Аль Халифа басшылығындағы тайпаның бір бөлігі Бахрейн шығанағының солтүстік-шығысындағы Катар түбегіне көшті. Жылдар өткен соң Аль Халифа өкілі шейх Мұхаммед Иран билеушісінен Бахрейн архипелагын жалға алды (алайда жалдау мерзімі 1782 жылы аяқталды). Осылайша, Аль Халифа әулетінің мүшелері Бахрейнде пайда болып, орнықты.

Кеден ережелері бойынша кейбір тауар түрлерін әкелуге шектеулер бар. 18 жастан асқан тұлғаларға 200 темекі, 50 сигара және 250 г табак, 1 л алкогольді ішімдік немесе 6 банка сыраны бажсыз әкелуге рұқсат етіледі (тек мұсылман еместерге рұқсат етілген). 240 мл парфюмерия; жалпы құны 250 BHD (шамамен 600 АҚШ доллары) болатын сыйлықтарды әкелуге рұқсат етіледі. Отты қару, оқ-дәрі, есірткі, әшекей бұйымдарын әкелуге (экспорттау үшін сатып алуды ресми түрде рәсімдеу қажет болады) тыйым салынады. Уақытша тыйым салу Оңтүстік-Шығыс Азия елдерінен үй құстарын әкелуге қолданылады.

Қауіпсіздік. Бахрейнде үкімет ғимараттарын, мұнай-газ кәсіпорындарын, әскери нысандарды және сарайларды суретке түсіруге тыйым салынады. Жергілікті тұрғындарды суретке түсіру үшін міндетті түрде олардың рұқсатын сұрау керек, әсіресе әйелдерден, олар көбінесе туристерге рұқсат бермейді.

Тағамдар: Бахрейнде әлемнің әртүрлі елдерінің тағамдарын дәм татуға болады: мейрамханаларда араб, еуропалық, тай, үнді, мексикалық және тіпті орыс тағамдарын ұсынады. Халықаралық мәзірді әрқашан дерлік ұлттық асхананың керемет тағамдарымен толықтырады, оның ішінде теңіз өнімдерінің кең таңдауы: пісірілген балық пен ет, палау, бұқтырылған ет, қой еті котлеттері, үйрек, күркетауық және тауықтан жасалған тағамдар. Ішімдіктердің ішінде ең танымалы – кофе. Оны мұнда тек «қайнатып» қана қоймайды, оны арнайы рәсімді сақтай отырып ұсынады, бұл туристерге ұнайтыны сөзсіз. Бахрейнде алкогольге лоялды қарайды. Ішімдіктер еркін сатылады, тіпті жергілікті алкогольді ішімдіктер – сыра мен анис арағы да бар.

Бахрейндегі десерттер – өнер туындылары десек болады! Жергілікті тұрғындардың сүйікті тағамы, сондай-ақ туристердің де сүйікті тағамы – қант және құрма араласқан қоңыр тәтті күріш, шығыстық тәттілер, сондай-ақ жаңа піскен жемістер мен құрмалар.

Маңызды: әрбір діни мереке қарсаңында бір күн бұрын Бахрейнде алкогольдік ішімдіктерді сату тоқтатылады.

Мінез-құлық ережелері: Бахрейн – мұсылман елі, сондықтан туристер қарапайым киінуі керек. Жағажай киімі кез келген жағажай қонақүйлеріне, клубтарына, мейрамханаларына баруға жарамды. Жеңіл жазғы киіммен елде жыл бойы жайлы жүруге болады. Бірақ қыс мезгілінде саяхаттау кезінде кешке мезетіне қажет болатын жылы күртешені алып келу керек.

Мерекелер:

• Жұма демалыс күні (әлемдегі барлық мұсылмандарға ортақ күн).
• Жаңа жыл – 1 қаңтар
• Конституция күні – 16 желтоқсан
• Ұлт күні – 16 ақпан

Көрнекті орындар

Барбар Храмы (Barbar Temple) – Бахрейннің культтік көрнекті орны, біздің дәуірімізге дейінгі 3000-2000 жылдарға жататын 3 ежелгі ғимараттың кешені. Олар бірінің үстіне бірі орналасқан. Мұнда Дильмун дәуірінде табынған жер астынан шығатын бұлақтың қалдықтары сақталған.

Сейяди үйі (Seyadi House) – 1905 жылы салынған ғимарат, ұлттық сәулет өнерінің тамаша үлгісі. Мухаррак қаласында орналасқан.

«Корольдердің қабірлері» – тарихи маңызы бар қорғандар кешені. А’али ауылының жанында орналасқан. Мұнда ежелгі монархтардың некрополі орналасқан деп саналады.

Түйе фермасы (Camel Farm)– 400-ден астам түйе бар мал шаруашылығы фермасы, олар ашық аумақта табиғи жағдайда өмір сүреді. Осыған байланысты туристер түйелерді жақыннан көріп, қалаған жағдайда ферма аумағында түйеге мініп серуендеуге мүмкіндік алады.

Джебель-ад-Дукхан тауы – аралдың ең биік тауы, ол аударғанда «Түтін тауы» дегенді білдіреді, оның биіктігі 134 м. Таудың тағы бір атауы – «нөмір 1 ұңғыма», ол әлі күнге дейін көптеген мұнай қазу мұнараларымен қоршалған. Джебель-ад-Дукханның жанында Бахрейннің культтік орны «Өмір ағашы» орналасқан – бұл 400 жастан асқан мескит ағашы (акация), ол судан айырылған шөлдің дәл ортасында өседі. Жергілікті тұрғындар бұл бір кездері осы жерде орналасқан Едемнің жұмақ бақтарынан шыққан ағаш екеніне сенімді.

Аль-Мухаррак аралы (Al Muharraq) – Бахрейн аралының шығысында орналасқан, тарихи ғимараттары сақталған әсем арал. Мұнда шейх Иса Бин Али Аль Халифаның үйі және XVI ғасырдағы ежелгі форттар Абу-Махир және Калат-Арад орналасқан.

Хавар архипелагы – 16 аралдан тұратын көркем аралдар тобы, бұл таза табиғат пен таңғажайып әдеміліктің үлгісі: теңіз, пальмалар, шөл құмдары.

«Хэндикрафт орталығы» (Handicraft Centre) – негізгі туристік аймақ, Бахрейн шеберлерінің қолымен жасалған негізгі көрнекті орындар: өрілген пальма бұйымдары, қыш ыдыстар, тоқылған маталар, оның ішінде бәдәуи тоқыма бұйымдары, кувейт мүсіндері, дәстүрлі доу қайықтарының модельдері. Осы қолдан жасалған бұйымдардың барлығы туристер бөлмелермен жүріп келе жатып уақыт саяхатына аттанғандай көрінетін көптеген бөлмелерден тұратын бір орталықта жиналған.

«Формула-1» – 2004 жылдан бастап Бахрейнде шөлдің ортасында салынған «Сахир» автодромында өтетін әйгілі жарыс кезеңдері. Бахрейннің «Формула-1» Гран-приі – бұл жылдамдық мерекесі және барлық жарыс әуесқойлары үшін үлкен оқиға! Бахрейнде әйгілі жарысушы Михаэль Шумахер де бір жеңісін жеңіп алды.

Аль-Арин қорығы (Al-Areen Wildlife Park & Reserve) – Бахрейн астанасынан 27 км қашықтықта орналасқан ұлттық табиғи парк, екі бөліктен тұрады. Тек саяхатшыларға арналған бірінші бөлігі ашық, ал екінші бөлігіне арнайы рұқсатпен ғана кіруге болады. Бірақ ашық аймақтың өзі жануарлар әлемін сүйетіндерге қатты әсер етеді. 9 км² аумақта жануарлар, құстар және өсімдіктер үшін табиғи тіршілік ету ортасы жасалған. Саябақта барлығы 500 түрлі құстар мен жануарлар бар: зебра, антилопа бейза, араб газелі, шөл кірпі, алып тасбақа, түйе, сондай-ақ жойылып бара жатқан араб ориксі; түйеқұс, фламинго, дегелек, жабайы үйрек, сұңқар. Саябақта 100 000 сирек өсімдік өседі.

Сауда. Бахрейндегі сауда, кез келген араб еліндегідей, ең алдымен, барлығын сатып алуға болатын көптеген базарлардан тұрады, мұнда киім, зергерлік бұйымдар, дәмдеуіштер, тағамдар алуға болады. Ең танымал базарлар – Манама орталығындағы Баб Аль Бахрейн(Bab Al Bahrain) және Алтын базар(Gold Souq); Хамад қаласындағы Ятама (Yatama Souq) – қыш бұйымдарын сатып алғысы келетіндер үшін; інжу-маржан фермалары – інжу бұйымдарының әуесқойлары үшін (Бахрейнде інжу аукциондары да өткізіледі). Бахрейнде заманауи сауда орталықтары да бар. Ең танымалдарын ұсынамыз: Манамадағы 300 дүкен мен бутиктері бар «Сиф Молл» (Seef Mall); «Ятим орталығы» (Yateem Centre); «Бахрейн Сити-центр» (Bahrain City Centre) – сауда-ойын-сауық кешені; сондай-ақ «Марина Молл» (Marina Mall), «Дана Молл» (Dana Mall), «Аль-Али Молл» (Al-Aali Mall), «Кантри Молл» (Country Mall), «Аль Мехза» (Al Mehza Complex), «Лайали шопинг орталығы» (Layali Shopping Centre), «Ситра Молл» (Sitra Mall), «Иса Таун» (Isa Town) және басқалар. Азық-түлік пен алғашқы қажетті тауарларды сатып алу үшін туристер үлкен супермаркеттерді таңдайды: «Явад Фуд Гарден» (JawadFoodGarden), «Каркефур» (Carкefoor), «Ориентал» (OrientalSupermarket), «Мега Март» (MegaMart), «Аль Джазира» (AlJazira) және басқалар.

Қонақ үй базасы. Бахрейндегі қонақ үйлердің саны 5* және 4* деңгейінде, соның ішінде танымал әлемдік брендтерге тиесілі. 4* төмен емес деңгейдегі қонақ үйді таңдауды ұсынамыз. Халықаралық тізбектегі қонақ үйлердің ассортименті өте үлкен: The Ritz-Carlton Hotel & Spa, Sheraton, Intercontinental, Radisson SAS, Crowne Plaza, Gulf Hotel және тіпті ертегіге ұқсас Banyan Tree Al Areen. Көптеген қонақ үйлер қазір салынуда. Жақын арада олар алғашқы қонақтарын қабылдай бастайды: Ritz-Carlton (Бахрейндегі әйгілі брендтің екінші қонақ үйі), Four Seasons, Marriott, Kempinski, Sofitel.

Белсенді демалыс.

Су спорт түрлері. Бахрейнде су спорт түрлерімен айналысу үшін тамаша жағдайлар жасалған. Табиғатта, кәсіби сәулетшілер, дизайнерлер, құрылысшылар да бұған атсалысқан. Жыл бойы мұнда суға сүңгу, виндсерфинг, яхтингпен айналысуға мүмкіндік бар. Елде спортшылар мен жаңадан келгендерге қызмет көрсететін клубтар жұмыс істейді. Бахрейндегі ең танымал су спорт түрі – суға сүңгу болып табылады. Архипелагтың көптеген аралдары, қолайлы ауа-райы жағдайлары – жыл бойы жайлы ауа температурасы мен жылы мөлдір су, көркем маржан рифтері, бай су асты әлемі – мұның бәрі сүңгулер үшін тамаша жағдай жасайды. Су асты әлемі өте алуан түрлі: мұнда 200-ден астам балық түрлері, 30-ға жуық маржан полиптері бар, ал оңтүстігінде тіпті теңіз сиырларын кездестіруге болады. Бахрейннің солтүстік рифтерінің су асты әлемі ең алуан түрлі. Сүңгуірлер арасында інжу-маржан аңшылары да бар. Елдің теңіз суларының тереңінде суға батқан кемелер мен ұшақтардың қалдықтарын жиі кездестіруге болады.

Атпен жүру – араб әлеміндегі ең танымал ойын-сауықтардың бірі. Керемет сұлу және сабырлы мінезді әлемге әйгілі таза тұқымды араб жылқыларына мінуді ұсынамыз.

Бахрейн халықаралық жарыс трассасы (Bahrain International Circuit) – суперзаманауи жабдықтары бар бірегей орын, Парсы шығанағының дәл ортасында орналасқан.

Риффа гольф клубы (Riffa Golf Club) – кәсіби гольф клубы, 18 шұңқырлы гольф алаңы және түнде ойнауға арналған 9 шұңқырлы алаңы бар, жетекші гольф дизайнері Карл Литтонның авторлық жұмысы.

Бахрейнге шақырамыз!

Мұнда көріп қана қоймай, сонымен қатар армандайтын көп нәрсе бар:

• Бахрейнде әлемнің барлық елдерінен коммерциялық мекемелерді тарту үшін «қаржы айлағы» салынуда. Бүгінгі таңда ел оффшорлық қаржы ұйымдарының ірі орталығы болып табылады.
• Болашақтың екінші ірі жобасы – бұл жалпы ауданы 20 км² болатын курортты қаланы салу: Durrat Al Bahrain Amwaj аралы супер заманауи туристік орын болуға уәде береді. Мұнда тематикалық саябақтар, қонақ үйлер, яхта айлақтары және сәнді жағажайлары бар керемет инфрақұрылым жасалады.
• Қазақстан азаматтарының Бахрейн Корольдігіне кіру тәртібі
• Бахрейнге туристік сапарлар үшін сізге виза қажет, оны онлайн Electronic Visa Eligibility - Bahrain E-Visa (evisa.gov.bh) сайтынан немесе елге келген кезде алуға болады. Виза жасына қарамастан барлық туристерге қажет. Виза алу ақылы.
• Сонымен қатар, жергілікті билік мынадай талаптарды қоюға құқылы екенін есте ұстаған жөн:
• Кері билетті көрсету (барлығына міндетті);
• Бахрейнде төлемдер жасау қабілетінің бар екендігін растау (күніне шамамен 100 АҚШ доллары);
• Туристік ваучерді және қонақ үй брондарын растау немесе қабылдаушы тараптың нақты мекенжайын көрсету;
• Елге келушілер жергілікті дәстүрлер мен әдет-ғұрыптарды құрметтеуге және сақтауға міндетті, әйтпесе жергілікті билік азаматты депортациялауға және оған Бахрейнге кіруге тыйым салуға құқылы.
• Жергілікті билік Бахрейнге кіретін кез-келген адамға виза беруден себепсіз бас тарту құқығын өзіне қалдырады.